İspaniya Superkubokunda ilk finalçı bəlli olub

İspaniya Superkubokunun yarımfinal mərhələsində “Barselona” ilə “Atletik” (Bilbao) qarşılaşıb.

90deqiqe.Az xəbər verir ki, Səudiyyə Ərəbistanının Ciddə şəhərindəki “King Abdullah Sports City” stadionunda baş tutan matç “mavi-qırmızılar”ın 5:0 hesablı qələbəsi ilə yekunlaşıb.

22-ci dəqiqədə “Barselona”nın hücumçusu Ferran Torres komandasını hesabda önə çıxarıb. 30-cu dəqiqədə yarımmüdafiəçi Fermin Lopes üstünlüyü artırıb, 34-cü dəqiqədə isə kanat oyunçusu Runi Bardji hesabı daha da böyüdüb. 39-cu dəqiqədə braziliyalı Rafinya dördüncü qolu vurub, 52-ci dəqiqədə isə o, dubl edib.

Beləliklə, “Barselona” İspaniya Superkubokunun finalına vəsiqə qazanıb. Final matçı yanvarın 11-də keçiriləcək və “mavi-qırmızılar”ın rəqibi “Atletiko” ilə “Real” arasında keçiriləcək Madrid derbisinin qalibi olacaq.