“DH Volley” gərgin mübarizədən sonra finalda

Qadın voleybolçular arasında Azərbaycan Yüksək Liqasında yarımfinal mərhələsinin cavab oyunları başlayıb.

90deqiqe.Az xəbər verir ki, ilk qarşılaşmada “DH Volley” “Milli Aviasiya Akademiyası” ilə üz-üzə gəlib. Gənclər və İdman Nazirliyinin Voleybol Mərkəzində keçirilən görüş 3:2 hesabı ilə “Milli Aviasiya Akademiyası”nın xeyrinə başa çatıb.

Lakin ilk oyunda 3:0 hesablı qələbə qazanan “DH Volley” ümumi nəticədə üstün olduğu üçün “qızıl set”də 15:12 hesabı ilə qalib gələrək finala yüksəlib.

Yarımfinalın digər oyununda “Turan” və “Gəncə” komandaları 13 apreldə qarşılaşacaq.

Qeyd edək ki, reqlamentə əsasən yarımfinal mərhələsi ev-səfər prinsipi ilə iki oyundan ibarətdir. Bərabərlik olarsa, qalib “qızıl set”lə müəyyən edilir. Bürünc və qızıl medal oyunları isə bir görüşdən ibarət olacaq.