Minifutbol üzrə Avropa çempionatında 1/8 final cütləri müəyyənləşdi

Slovakiyada keçirilən minifutbol üzrə Avropa çempionatında qrup mərhələsinə yekun vurulub və pley-off mərhələsinin bütün iştirakçıları bəlli olub.

90deqiqe.Az  xəbər verir ki, yarışın dördüncü oyun günündə keçirilən qarşılaşmalardan sonra 1/8 final mərhələsinin cütləri rəsmiləşib.

Azərbaycan millisi qrup mərhələsini inamlı çıxışla başa vuraraq F qrupunun qalibi olub. Elşad Quliyevin rəhbərlik etdiyi komanda Avstriya (1:0), İtaliya (3:0) və Fransa (3:2) üzərində qələbə qazanaraq maksimum nəticə – 9 xalla növbəti mərhələyə yüksəlib.

Yığmamız 1/8 finalda Qazaxıstan millisi ilə qarşılaşacaq. Qazaxıstan seçməsi öz qrupunda ikinci yeri tutaraq pley-offa vəsiqə qazanıb.

Qrup mərhələsinin yekunlarına əsasən Bosniya və Herseqovina, Yunanıstan, Çexiya, Bolqarıstan, Ukrayna, Serbiya, Rumıniya, Gürcüstan, Fransa, Avstriya və Azərbaycan da növbəti mərhələyə adlayıblar.

1/8 final mərhələsinin cütləri:

• Bosniya və Herseqovina – Macarıstan
• Bolqarıstan – Fransa
• Polşa – Gürcüstan
• Ukrayna – Portuqaliya
• Rumıniya – Avstriya
• Yunanıstan – Serbiya
• Çexiya – Monteneqro
• Azərbaycan – Qazaxıstan

Qeyd edək ki, Avropa çempionatında 1/8 final mərhələsinin oyunları yaxın günlərdə keçiriləcək. Azərbaycan millisi isə turnirdə uğurlu çıxışını davam etdirərək dörddəbir finala yüksəlmək uğrunda mübarizə aparacaq.