Azərbaycan millisi Avropa çempionatının finalına yüksəldi

Minifutbol üzrə Azərbaycan millisi Slovakiyanın paytaxtı Bratislavada keçirilən Avropa çempionatında finala vəsiqə qazanıb.

90deqiqe.Az xəbər verir ki, Elşad Quliyevin rəhbərlik etdiyi yığma yarımfinal mərhələsində Serbiya millisi ilə üz-üzə gəlib.

“Tipos Arena”da baş tutan gərgin qarşılaşmanın əsas vaxtında qalib müəyyənləşməyib. Tərəflərin hərəyə bir dəfə fərqləndiyi oyunda hesab 1:1 olub.

Finalçının adına penaltilər seriyasında aydınlıq gəlib. Burada daha dəqiq oynayan Azərbaycan millisi rəqibini 3:1 hesabı ilə üstələyərək həlledici görüşə yüksəlib.

Qeyd edək ki, yığmamız Avropa çempionatının finalında Ukrayna millisi ilə qarşılaşacaq. Həlledici oyun iyunun 4-də keçiriləcək.