Azərbaycan avarçəkəni Litvada gümüş medal qazandı

Akademik avarçəkmə üzrə gənclərdən ibarət Azərbaycan millisinin üzvü Azər İlyasov Litvanın Şaulyay şəhərində keçirilən açıq Litva çempionatını gümüş medalla başa vurub.

Azərbaycan Su İdman Federasiyasından 90deqiqe.Az-a bildirilib ki, hazırda Litvada təlim-məşq toplanışında olan idmançı yerli avarçəkənlərlə yanaşı, ABŞ, İsveçrə və İsraildən olan rəqiblərlə mübarizə aparıb.

Azər İlyasov 15 idmançının iştirak etdiyi yarışın yarımfinal mərhələsini uğurla adlayaraq A finalına yüksəlib. Yağışlı və küləkli hava şəraitində keçirilən həlledici yürüşdə təmsilçimiz 2000 metr məsafəni 7 dəqiqə 52 saniyəyə qət edib.

Azərbaycanlı avarçəkən yalnız ev sahibi Litvanın idmançısına uduzaraq yarışı ikinci pillədə başa vurub və çempionatın gümüş medalına layiq görülüb.