Azərbaycan güləşçisi U-17 dünya çempionatında mübarizəni dayandırdı

Bakıda keçirilən U-17 dünya çempionatında çıxış edən Azərbaycanın sərbəst güləşçisi Hüseyn Rzazadə yarışla vidalaşıb.

90deqiqe.Az-ın məlumatına görə, 48 kq çəki dərəcəsində mübarizə aparan idmançı ikinci təsəlliverici görüşdə ABŞ təmsilçisi Kuper Deputiyə 1:12 hesabı ilə məğlub olaraq çıxışını başa vurub.

Hüseyn Rzazadə ikinci təsəlliverici qarşılaşmaya qədər ilk təsəlliverici görüşdə İran güləşçisi Amirali Fazını 9:6 hesabı ilə məğlub edərək növbəti mərhələyə yüksəlmişdi.

Qeyd edək ki, U-17 dünya çempionatı Milli Gimnastika Arenasında keçirilir. Yarışda 60-dan çox ölkədən 700-ə yaxın yeniyetmə güləşçi mübarizə aparır.

Azərbaycan mundialda 29 pəhləvanla təmsil olunur.