Azərbaycan millisi Avropa çempionatında növbəti qələbəsini qazandı

Azərbaycanın 18 yaşadək qızlardan ibarət basketbol millisi Rumıniyada keçirilən Avropa çempionatının B divizionunda növbəti oyununu keçirib.

90deqiqe.Az-ın məlumatına görə, 17-20-ci yerlər uğrunda mübarizə aparan yığmamız bu dəfə Estoniya seçməsi ilə üz-üzə gəlib. Gərgin keçən qarşılaşmada Azərbaycan millisi 74:71 hesablı qələbə qazanıb.

Bu nəticə ilə komandamız təsnifat mərhələsində ardıcıl ikinci qələbəsini əldə edib. Millimiz daha əvvəl Şimali Makedoniyanı 75:73 hesabı ilə məğlub edib.

Azərbaycan yığması növbəti oyununu sabah Norveç millisinə qarşı keçirəcək.

Qeyd edək ki, komandamız qrup mərhələsində Rumıniyaya (55:81), Portuqaliyaya (52:90), Niderlanda (72:79) və İslandiyaya (74:77) məğlub olub.