Azərbaycanın yeniyetmə stolüstü tennisçiləri Türkiyədə 4 medal qazanıblar

Azərbaycanın yeniyetmə stolüstü tennisçiləri Türkiyənin Yalova şəhərində keçirilən beynəlxalq turnirdə uğurlu çıxış ediblər.

Azərbaycan Stolüstü Tennis Federasiyasından 90deqiqe.Az-a verilən məlumata görə, müxtəlif ölkələrdən idmançıların qatıldığı yarışda Azərbaycan təmsilçiləri 4 medal qazanıblar.

Komanda yarışında Vaqif Babayev və Şakir Qədirov ikinci, Banu İmanverdizadə və Sofiya Trofimenko isə üçüncü yeri tutublar.

Şəxsi mübarizədə U-15 yaş kateqoriyasında çıxış edən Vaqif Babayev və Şakir Qədirov bürünc medala sahib çıxıblar.

Qeyd edək ki, məşqçilər Billurə Eminova və Zakir Cavadovun rəhbərliyi ilə Türkiyəyə yollanan Azərbaycan idmançıları avqustun 8-dən 14-dək Yalova şəhərində təşkil olunan beynəlxalq təlim-məşq toplanışında da iştirak ediblər.