Azərbaycan millisi U-16 Avropa çempionatında 5-ci oldu

Azərbaycanın 16 yaşadək qızlardan ibarət basketbol millisi FIBA U-16 Avropa çempionatının B divizionunda 5-ci pillədə qərarlaşıb.

90deqiqe.Az Azərbaycan Basketbol Federasiyasının mətbuat xidmətinə istinadən xəbər verir ki, milli komanda 5-7-ci yerlər uğrunda keçirdiyi görüşlərdə əvvəlcə Bosniya və Herseqovinanı 78:65, daha sonra isə Kipri 70:58 hesabı ilə məğlub edib.

Beləliklə, dörd oyunda iki qələbə qazanan Azərbaycan yığması turnirdəki qələbə faizini 16,7-dən 50-yə yüksəldib.

Komandanın heyətində Viktoriya Ulyanova məhsuldarlığı ilə seçilib. O, keçirdiyi 4 oyunda ümumilikdə 68 xal toplayaraq orta hesabla 17 xalla yığmanın ən məhsuldar basketbolçusu olub. Ulyanova Bosniya və Herseqovina ilə görüşdə 34 xal və 10 ribaundla yadda qalıb.

Aylin Niftəliyeva isə 4 oyunda 54 ribaundla bu göstərici üzrə turnirin lideri olub. Basketbolçu son iki qarşılaşmada ardıcıl olaraq “double-double” edib.

Aylin Əkbərzadə isə 37 məhsuldar ötürmə ilə B divizionu tarixində yeni rekord müəyyənləşdirib. O, Slovakiya ilə oyunda 7, İsveçə qarşı matçda 6, Bosniya və Herseqovina və Kiprlə görüşlərin hər birində 12 məhsuldar ötürmə verib.

15 yaşlı Qalina Quşina da komandanın uğurunda mühüm rol oynayıb. O, turniri orta hesabla 10,5 xalla başa vurub. Quşina Bosniya və Herseqovina ilə qarşılaşmada 14, Kipr üzərində qələbə qazanılan oyunda isə 18 xal toplayıb.

Qeyd edək ki, Azərbaycan millisi ötən il B divizionunda keçirdiyi 6 oyunun yalnız birində qələbə qazanmışdı. Bu dəfə isə komanda turniri 5-ci pillədə tamamlayıb.