Azərbaycan millisi Avropa çempionatına qələbə ilə başladı

Azərbaycanın qadınlardan ibarət voleybol milli komandası Bakıda keçirilən Avropa çempionatında ilk oyununa çıxıb.

90deqiqe.Az-ın məlumatına görə, Faiq Qarayevin rəhbərlik etdiyi yığma C qrupunun açılış qarşılaşmasında Portuqaliya seçməsi ilə üz-üzə gəlib. Milli Gimnastika Arenasında baş tutan görüş Azərbaycan komandasının 3:1 hesablı qələbəsi ilə başa çatıb.

Setlər üzrə hesab 25:22, 23:25, 27:25 və 25:20 olub.

Beləliklə, Azərbaycan millisi turnirə üç xalla başlayıb.

Qeyd edək ki, yığma Avropa çempionatında növbəti oyununu avqustun 23-də İspaniyaya qarşı keçirəcək. Bakıda C qrupunun qarşılaşmaları avqustun 28-dək Milli Gimnastika Arenasında təşkil olunacaq.