Azərbaycanın 14 cüdoçusu Lozanna “Böyük Dəbilqə”sində tatamiyə çıxacaq

Avqustun 28-30-da İsveçrənin Lozanna şəhərində cüdo üzrə “Böyük Dəbilqə” turniri keçiriləcək.

Azərbaycan Cüdo Federasiyasından 90deqiqe.Az-a verilən məlumata görə, Beynəlxalq Cüdo Federasiyasının (IJF) təqviminə daxil olan və “Los-Anceles-2028” Yay Olimpiya Oyunlarına lisenziya xalları qazandıran yarışda Azərbaycan 14 cüdoçu ilə təmsil olunacaq.

Milli komandanın heyətində 10 kişi və 4 qadın idmançı yer alıb.

Qadınların mübarizəsində 52 kq çəki dərəcəsində Gültac Məmmədəliyeva və Leyla Əliyeva, 70 kq-da Südabə Ağayeva, +78 kq-da isə Madina Kaisinova tatamiyə çıxacaq.

Kişilər arasında 60 kq çəki dərəcəsində Əhməd Yusifov, 66 kq-da Turan Bayramov və Ruslan Paşayev, 73 kq-da Kamran Süleymanov və Rəşid Məmmədəliyev, 81 kq-da Ömər Rəcəbli və Vüsal Qələndərzadə, 90 kq-da Vüqar Talıbov, +100 kq-da isə Kənan Nəsibov və Uşanqi Kokauri mübarizə aparacaq.

Üç gün davam edəcək turnirdə 78 ölkədən 518 cüdoçunun iştirakı gözlənilir. Onlardan 309-u kişi, 209-u isə qadın idmançıdır.

“Böyük Dəbilqə” yarışında Azərbaycanı yalnız idmançılar deyil, hakim də təmsil edəcək. Azərbaycan Cüdo Federasiyasının Hakimlər Komitəsinin üzvü, A kateqoriyalı beynəlxalq hakim Nazim Umbayev turnirin ədalət təmsilçiləri arasında yer alacaq.

Qeyd edək ki, Lozanna “Böyük Dəbilqə”si Dünya Cüdo Turunun yarışlarından biridir və turnirdə əldə olunacaq nəticələr “Los-Anceles-2028” Olimpiadasına lisenziya mübarizəsi baxımından mühüm əhəmiyyət daşıyır.