“Araz-Naxçıvan”ın Çempionlar Liqasındakı rəqibləri tam müəyyənləşdi

Futzal üzrə UEFA Çempionlar Liqasının əsas mərhələsində mübarizə aparacaq “Araz-Naxçıvan”ın rəqibləri tam müəyyənləşib.

Azərbaycan Futzal Federasiyasından 90deqiqe.Az-a verilən məlumata görə, ilkin mərhələnin yekunlarına əsasən Bosniya və Herseqovinanın “Buba Mara” və Macarıstanın “Uypeşt” klubları 5-ci qrupa vəsiqə qazanıblar.

Qeyd edək ki, iyulun 8-də keçirilən püşkatmaya əsasən, 5-ci qrupa E qrupunun qalibi düşməli idi. Lakin həmin qrupun qalibi Ermənistan çempionu “Unisport” olduğundan UEFA-nın mövcud qaydalarına əsasən Azərbaycan və Ermənistan təmsilçilərinin eyni qrupda yer almasına yol verilməyib.

Bu səbəbdən E qrupunun qalibi əvəzinə D qrupunun lideri “Uypeşt” 5-ci qrupa daxil edilib.

Beləliklə, əsas mərhələnin 5-ci qrupunda Polşanın “Piast”, Azərbaycanın “Araz-Naxçıvan”, Bosniya və Herseqovinanın “Buba Mara” və Macarıstanın “Uypeşt” komandaları mübarizə aparacaqlar.

Qrup mərhələsinin oyunları oktyabrın 27-dən noyabrın 1-dək Polşada keçiriləcək.

“Araz-Naxçıvan” UEFA Çempionlar Liqasında 21-ci dəfə iştirak edəcək. Azərbaycan təmsilçisi turnirdə iştirak sayına görə yalnız Qazaxıstanın “Kayrat” klubundan geri qalır.