Azərbaycanlı stolüstü tennisçi “Euro Mini Champs”da finala yüksəldi

Azərbaycanın gənc stolüstü tennisçisi Mehin Mirzəbalayeva Fransanın Strasburq şəhərində keçirilən “Euro Mini Champs” beynəlxalq yarışında uğurlu çıxışı ilə diqqət çəkib.

90deqiqe.Az-ın məlumatına görə, 2014-cü il təvəllüdlü idmançıların mübarizəsində iştirak edən Mehin Mirzəbalayeva turnirin ilk üç mərhələsini lider kimi başa vurub.

Azərbaycan təmsilçisi daha sonra 1/8 finalda moldovalı, 1/4 finalda isə fransalı rəqibini məğlub edərək yarımfinala vəsiqə qazanıb.

Yarımfinal qarşılaşmasında İsveçrə idmançısı ilə üz-üzə gələn Mehin Mirzəbalayeva rəqibini 3:0 hesabı ilə məğlub edib və “mini Avropa çempionatı” kimi tanınan nüfuzlu turnirin finalına yüksəlib.

Həlledici görüşdə stolüstü tennisçimizin rəqibi Latviya təmsilçisi olacaq.

Mehin Mirzəbalayevanın final qarşılaşması turnirin qalibini müəyyənləşdirəcək.