Dövlət qurumlarının əməkdaşları arasında velosiped yarışı keçirilib

Gənclər və İdman Nazirliyi ilə Azərbaycan Velosiped İdmanı Federasiyasının birgə təşkilatçılığı ilə dövlət qurumlarının əməkdaşları arasında velosiped yarışı keçirilib.

90deqiqe.Az-ın məlumatına görə, yarış Bakıdakı Veloparkda təşkil olunub. Mübarizədə 8 dövlət qurumunu təmsil edən əməkdaşlar iştirak ediblər.

İştirakçılar fərdi ötüşmə növündə qüvvələrini sınayıblar.

Kişilər arasında “AzerGold” QSC-nin təmsilçisi Pərviz Aslanov bütün rəqiblərini qabaqlayaraq birinci olub. Fövqəladə Hallar Nazirliyinin əməkdaşı Cavid Xəlilov ikinci, SOCAR-ın nümayəndəsi Rüstəm Rüstəmov isə üçüncü yeri tutub.

Qadınların mübarizəsində isə FHN təmsilçisi Leyla Əliyeva fəxri kürsünün ən yüksək pilləsinə qalxıb. Xarici İşlər Nazirliyinin əməkdaşı İlkanə Qasımova ikinci, FHN-in digər nümayəndəsi Sevda Verdiyeva isə üçüncü olub.

Yarışın qalibləri və fərqlənən iştirakçılar medal, diplom və müxtəlif hədiyyələrlə təltif ediliblər.