“Araz-Naxçıvan”ın Çempionlar Liqasındakı oyunlarının keçiriləcəyi arena bəlli oldu

Futzal üzrə UEFA Çempionlar Liqasında Azərbaycanı təmsil edəcək “Araz-Naxçıvan”ın 5-ci qrupda keçirəcəyi oyunların məkanı müəyyənləşib.

Azərbaycan Futzal Federasiyasından 90deqiqe.Az -a verilən məlumata görə, oktyabrın 27-dən 30-dək keçiriləcək qrup mərhələsinin qarşılaşmaları Polşanın Qlivitse şəhərində yerləşən “PreZero Arena”da baş tutacaq.

13 752 tamaşaçı tutumuna malik arena 2018-ci ildə istifadəyə verilib. İlk olaraq “Podium Hol” adlandırılan məkan daha sonra “Qlivitse Arena” adı ilə fəaliyyət göstərib. 2023-cü ildə sponsorla bağlanmış müqaviləyə əsasən arenanın adı “PreZero Arena” olaraq dəyişdirilib.

Arenanın tikintisinə 98 milyon avro vəsait xərclənib.

Qeyd edək ki, “Araz-Naxçıvan” 5-ci qrupda ev sahibi “Pyast” (Polşa), “Buba Mara” (Bosniya və Herseqovina) və “Uypeşt” (Macarıstan) komandaları ilə qarşılaşacaq.