Yelkən idmanı üzrə açıq Azərbaycan çempionatına yekun vurulub

Yelkən idmanı üzrə açıq Azərbaycan çempionatına yekun vurulub.

Azərbaycan Su İdman Növləri Federasiyasından  90deqiqe.Az-a verilən məlumata görə, Gənclər və İdman Nazirliyi ilə Azərbaycan Su İdman Növləri Federasiyasının birgə təşkilatçılığı ilə keçirilən yarış Şıxov çimərliyi ərazisində yerləşən Yelkən Mərkəzində baş tutub.

Üç gün davam edən çempionatda Azərbaycan və Türkiyədən olan idmançılar Optimist və ILCA4 sinifləri üzrə mübarizə aparıblar. İştirakçılar küləyin istiqaməti və sürətinə uyğun müəyyənləşdirilən marşrut üzrə müxtəlif yürüşlərdə güclərini sınayıblar. Yekun nəticələr bütün yürüşlərdə toplanan xallar əsasında müəyyənləşdirilib.

Bağlanış mərasimində çıxış edən gənclər və idman naziri Fərid Qayıbov Azərbaycanda idmana göstərilən dövlət dəstəyindən danışıb. Nazir Azərbaycan yelkənçiləri ilə yanaşı, Türkiyədən olan iştirakçıları da salamlayıb və çempionatın yüksək səviyyədə təşkil olunduğunu bildirib. Fərid Qayıbov idmançıları təbrik edərək onlara qarşıdakı yarışlarda uğurlar arzulayıb.

Çempionatın qalibləri diplom, medal və federasiya tərəfindən təqdim olunan hədiyyələrlə mükafatlandırılıblar. Yarışda iştirak edən bütün idmançılara isə sertifikatlar təqdim olunub.

Həmçinin 2025-ci ilin Azərbaycan çempionları Kamal Bəşirli (Optimist) və Davud Babazadənin (ILCA4) adları yelkən idmanının ənənəvi Şərəf lövhəsinə həkk olunub.

Mərasimin sonunda Azərbaycan Su İdman Növləri Federasiyasının təşkil etdiyi yelkən idmanı, avarçəkmə və kanoe üzrə Yay məktəbinin iştirakçıları da sertifikatlarla təltif ediliblər.

Yarışın nəticələri

Açıq Azərbaycan çempionatı

Optimist / U-12

1. Tunahan Piker – Türkiyə
2. Alya Bayraktar – Türkiyə
3. Kamilla Həsənova – Azərbaycan

Optimist / qızlar

1. Janset Tuğan – Türkiyə
2. Səma Mansurzadə – Azərbaycan
3. Alya Bayraktar – Türkiyə

Optimist / ümumi kateqoriya

1. Mert Durkal – Türkiyə
2. Rüzgar Uzel – Türkiyə
3. Kamal Bəşirli – Azərbaycan

Azərbaycan çempionatı

Optimist / U-12

1. Kamilla Həsənova
2. Leyli Məmmədli
3. Gülnisə İsmayılova

Optimist / qızlar

1. Səma Mansurzadə
2. Yağmur Həsənli
3. Kamilla Həsənova

Optimist / ümumi kateqoriya

1. Kamal Bəşirli
2. Nurlan Ağazadə
3. Amin Cəlilzadə

ILCA4

1. Nərgiz Məmmədova
2. Amira Bayramova
3. Davud Babazadə