Azərbaycan qadın basketbol millisinin yeni baş məşqçisi müəyyənləşib

Azərbaycan qadın basketbol millisinin yeni baş məşqçisi müəyyənləşib.

Azərbaycan Basketbol Federasiyasından 90deqiqe.Az-a verilən məlumatına görə, yunanıstanlı mütəxəssis İoannis Diamantakos bu vəzifəyə təyin olunub. O, eyni zamanda bütün yaş qrupları üzrə qadın milli komandalarının koordinatoru olacaq.

Diamantakosla 2 illik müqavilə imzalanıb.

Mütəxəssisin son iş yeri Səudiyyə Ərəbistanının “AlUla” klubu olub. O, daha əvvəl Livan Basketbol Federasiyasında texniki koordinator, həmçinin bu ölkənin qadınlardan ibarət əsas milli komandasında, U-18 oğlan və qız yığmalarında baş məşqçi kimi çalışıb. Bundan əlavə, Fələstin milli komandasına və Rumıniyanın U-20 yığmasına rəhbərlik edib.

Klub səviyyəsində Yunanıstan, Rumıniya, Fələstin və Səudiyyə Ərəbistanında fəaliyyət göstərən Diamantakosun karyerasında FIBA Asiya Kubokunun B divizionunda U-18 qadınlar arasında və U-18 WABA turnirində gümüş medallar, Fələstin Basketbol Liqasında çempionluq və Yunanıstanda iki liqa çempionluğu var. O, komandaları ilə Avropa Kubokunda ən güclü səkkizlikdə yer alıb və U-20 Avropa çempionatını 5-ci pillədə başa vurub.

İoannis Diamantakos psixologiya üzrə fəlsəfə doktorudur.

Yeni baş məşqçinin əsas milli komanda ilə ilk hədəfi 2026-cı ilin noyabrında və 2027-ci ilin fevralında keçiriləcək 2029-cu il qadınlar arasında Avropa çempionatının ilkin seçmə mərhələsində mübarizə aparmaqdır. Qarşıdakı dövrdə U-16, U-18 və U-20 yığmalarının hazırlığı da diqqət mərkəzində olacaq.

Qeyd edək ki, Diamantakos yeni vəzifəsində əsas milli komanda ilə yanaşı, qadın basketbolunun bütün yaş qrupları üzrə inkişaf proqramına da rəhbərlik edəcək.