“Dünyanın ən güclülərini hələ də məğlub edə bilərəm”

“Böyük dəbilqə” turnirlərinin 24 qat qalibi Novak Cokoviç Pekində keçirilən ATP-500 turnirində dünyanın ikinci raketkası Aleksandr Zverev üzərində qazandığı qələbənin gələcək motivasiyasına necə təsir edəcəyindən danışıb.

90deqiqe.Az-ın məlumatına görə, serbiyalı tennisçi bildirib ki, məhz bu cür qələbələr onu karyerasını davam etdirməyə və hər gün məşq etməyə həvəsləndirir.

“Bunu kortda da demişdim və yenidən təkrarlayacağam: məhz belə oyunlar mənim üçün çıxışlarımı davam etdirmək və demək olar ki, hər gün özümü məşq etməyə məcbur etmək baxımından əsas motivasiyadır. Belə səviyyəyə çatmaq, dünyanın ən güclü tennisçiləri ilə oynamağa və onları məğlub etməyə hazır olmaq istəyirəm. Bu gün axşam da belə oldu.

Bu, mənim üçün hələ də dünyanın ən güclü tennisçilərini ən böyük arenalarda məğlub edə bildiyimi göstərən bir növ sübutdur. Mən bunu həmişə bilmişəm və indi də bilirəm. Əlbəttə, hazırda vəziyyət bir qədər fərqlidir. Gənc tennisçilərin nümayiş etdirdiyi kimi, davamlı olaraq ən yüksək səviyyədə oynamaq çətindir.

Özümdən çox razıyam və sərf etdiyim səylərlə fəxr edirəm. Dediyim kimi, ümumilikdə hisslərim əladır. Təbii ki, belə yaxşı oynadıqda özünəinamın artır, problemləri və çətinlikləri unudursan və sadəcə irəliləməyə davam edirsən”, - deyə Cokoviç mətbuat konfransında bildirib.