III Beynəlxalq Xankəndi Ultramarafonu keçiriləcək

Oktyabrın 8-dən 11-dək III Beynəlxalq Xankəndi Ultramarafonu keçiriləcək.

Bakı Şəhər Halqası (BŞH) Əməliyyat Şirkətindən 90deqiqe.Az-a verilən məlumata görə, Gənclər və İdman Nazirliyi, Azərbaycan Atletika Federasiyası və BŞH-nin birgə təşkilatçılığı ilə keçiriləcək yarış Qəbələ şəhərindən start götürəcək.

İştirakçılar 192 kilometrlik məsafəni qət edərək Xankəndidə finişə çatacaqlar. Yarışda 5 ölkədən 100 atletin iştirakı gözlənilir.

Ultramarafonun keçirilməsində əsas məqsəd sağlam həyat tərzinin və qaçış idmanının təbliği, eləcə də Azərbaycanın müxtəlif bölgələrinin idman vasitəsilə tanıdılmasıdır.

Yarış dörd mərhələdən ibarət olacaq. Qəbələ–Ağdaş mərhələsi 55, Ağdaş–Bərdə 65, Bərdə–Ağdam 44, Ağdam–Xankəndi mərhələsi isə 28 kilometr təşkil edəcək. Hər mərhələnin qalibləri ayrıca mükafatlandırılacaq, ümumi sıralamada birinci olan atletlər isə baş mükafata layiq görüləcəklər.

Qeyd edək ki, Xankəndi Ultramarafonu ilk dəfə 2024-cü ildə Xankəndi–Bakı marşrutu üzrə keçirilib. Həmin yarışda 4 ölkədən 64 atlet iştirak edib və 380 kilometrlik məsafə qət olunub.

2025-ci ildə isə ultramarafon Qəbələ–Xankəndi marşrutu üzrə təşkil olunub və 6 ölkədən 81 atlet mübarizə aparıb.

Beləliklə, 2026-cı ildə üçüncü dəfə keçiriləcək Xankəndi Ultramarafonu yenidən Qəbələ–Xankəndi marşrutu üzrə təşkil olunacaq.