Azərbaycanın qadın güləşçiləri Qazaxıstanda təlim-məşq toplanışına başlayıblar

Azərbaycanın qadın güləşi üzrə milli komandasının üzvləri Qazaxıstana yollanıblar.

Azərbaycan Güləş Federasiyasından 90deqiqe.Az-a verilən məlumata görə, böyük məşqçi Ağahüseyn Mustafayevin rəhbərliyi altında Jalə Əliyeva (57 kq), Ruzanna Məmmədova (59 kq) və Birgül Soltanovadan (65 kq) ibarət heyət oktyabrın 12-də Almatıda dünya çempionatına hazırlıq məqsədilə son təlim-məşq toplanışına başlayıb.

Oktyabrın 24-dək davam edəcək hazırlıq prosesi Qazaxıstan və Rumıniya yığmaları ilə birgə təşkil olunub. U-23 dünya çempionatı başa çatdıqdan sonra baş məşqçi əvəzi Toğrul Əsgərov da toplanışa qoşulacaq.

Hazırlıq çərçivəsində taktiki-texniki çalışmalara və rəqiblərin təhlilinə xüsusi diqqət yetirilir. Toplanış başa çatdıqdan sonra Azərbaycan komandası Almatıdan Astanaya yollanacaq.

Qeyd edək ki, dünya çempionatında qadın güləşi üzrə yarışlar oktyabrın 27-dən 30-dək keçiriləcək.