U-14 cüdoçular arasında ne-vaza üzrə ACF Kuboku keçiriləcək

Oktyabrın 24-də yeniyetmələr arasında ne-vaza üzrə ACF Kuboku təşkil olunacaq.

90deqiqe.Az-ın məlumatına görə, Azərbaycan Cüdo Federasiyasının təşkilatçılığı ilə Abşeron Olimpiya İdman Kompleksində keçiriləcək yarışda 63 klub və idman cəmiyyətini təmsil edən 333 cüdoçu mübarizə aparacaq.

İştirakçılardan 271-i oğlan, 62-si isə qızdır. İdmançılar ümumilikdə 17 çəki dərəcəsində medallar uğrunda yarışacaqlar.

Qeyd edək ki, ne-vaza cüdoda yerüstü (parter) mübarizə texnikalarını əhatə edir. Bu istiqamət üzrə hazırlıq idmançıların hücum və müdafiə bacarıqlarının inkişafına, eləcə də görüş zamanı müxtəlif taktiki vəziyyətlərə daha effektiv uyğunlaşmasına kömək edir.