550-ci səfər qolu

Azərbaycan Premyer Liqasının 14-cü turunun “Sabah” – “Neftçi” matçında vurulan son qol qonaqlar üçün əlamətdar olub.

Corner.az-ın PFL-in saytına istinadən xəbərinə görə, paytaxt klubu ölkə çempionatları tarixində 550-ci səfər qolunu vurub. Bu yubiley topunu isə Stiven Monroz qeyd edib. Onun 90+2-ci dəqiqədəki qolu komandasına 2:0 hesablı qələbə qazandırıb.

“Neftçi” 1992-ci ildən çıxış etdiyi çempionatlarda 550-ci səfər qolunu 390-cı oyununda vurub. Bakılılar yarışın tarixində rəqib meydanında ən çox qol vuran komandadır.

Qeyd edək ki, “Neftçi”nin Azərbaycan çempionatındakı ilk səfər qolunu 1992-ci il mayın 15-də Yunis Hüseynov vurub. O, “Avtomobilçi” ilə Yevlaxdakı matçın 21-ci dəqiqəsində fərqlənib. Həmin matçda qonaqlar 3:1 hesabı ilə qalib gəliblər.