Neftçi məni istəmir, mən də burada qalmağı

"Neftçi" klubunun braziliyalı futbolçusu Dario Frederiko "Report"a müsahibə verib.Corner.az həmin müsahibəni təqdim edir:

- Təqribən 3 aylıq karantin dövründən sonra məşqləri bərpa etdiniz. Təəssüratlarınız necədir?

- Bir az qarışıq, qəribə hisslərdir. Əvvəl heç vaxt belə halla üzləşməmişəm. Amma artıq o günlər geridə qaldı. İndi əlimizdən gələnin ən yaxşısını etməliyik ki, tam hazır olaq.

- Komandalara mövsümün geridə qalan hissəsinə hazırlaşmaq üçün 3 həftə vaxt verilib. Sizcə, bu müddət optimal formaya qayıtmaq üçün kifayət edəcək?

- Az da olsa, bu müddət olduqca vacibdir. Verilən vaxtdan əvvəlki formamıza qayıtmaq və rəsmi oyun şəraitinə uyğunlaşmaq üçün maksimum istifadə etməliyik.

- Həftə sonları küçəyə çıxma qadağasına görə komandalar məşq edə bilmirlər. Bu amil futbolçulara necə təsir edəcək?

- Düşünürəm ki, təsir etməyəcək. Çünki onsuz da futbolçuların həftədə bir dəfə istirahət etməsi lazımdır.

- Azərbaycan Premyer Liqasının bərpasını arzulayanlarla yanaşı, mövsümün ləğvini istəyənlər də var. Bu mövzuda hansı fikirdəsiniz və sizcə, hansı qərar daha düzgün olar?

- Hər kəsin öz fikri var. Məncə, bundan sonra çempionatı davam etdirmək çox gecdir.

- Amma nəzərə alaq ki, çempionluq şansınız davam edir. Lider "Qarabağ"dan 8 xal geri qalırsınız. Mövsümün başa çatmasına isə hələ 8 tur var...

- Düzdür. Şans varsa, çempion olmaq üçün sonadək mübarizə aparmaq lazımdır.

- Bu ilin əvvəlində "Neftçi"dən getmək barədə düşünürdünüz. Fikrinizi dəyişməmisiniz?

- Xeyr. Onlar məni burada istəmirlər, mən də "Neftçi"də qalmağı. Çünki oynamıram, bu isə mənə çətinlik yaradır. Ehtiyatda oturmaqdan özüməinamı itirmişəm. Amma yalnız yaxşı təklif olacağı halda, komandadan ayrılacağam