Azərbaycan Premyer Liqasının 10-cu turunun “Keşlə” ilə qarşılaşmasındakı 3:1 hesablı qələbə “Zirə” üçün yubileylərlə əlamətdar olub.
Corner.az xəbər verir ki, Rəşad Sadıqovun çalışdırdığı kollektiv bütün turnirlər nəzərə alınmaqla öz meydanında 50-ci qələbəsini qazanıb.
Bu, klub tarixinin 100-cü ev oyununa təsadüf edib. Digər qarşılaşmalarda 26 heç-heçə və 24 məğlubiyyət qeydə alınıb.
Zirə İdman Kompleksinin stadionundakı görüş həm də Premyer Liqada 75-ci ev matçı və 35-ci qələbə olub. “Qartallar” öz meydanında 21 heç-heçə və 19 məğlubiyyət yaşayıb.
Qeyd edək ki, 50 ev qələbəsindən 35-i Premyer Liqaya təsadüf edibsə, I divizionda 9 (15 oyun), Azərbaycan kubokunda 5 (8 oyun), UEFA Avropa Liqasında 1 (2 oyun) qalibiyyət əldə olunub.
