Kimin qalacağını yalnız baş məşqçi bilir - Namaşko

"Keşlə"nin qapıçısı Stanislav Namaşko Azərbaycan kubokundakı qələbəni xüsusi qeyd etməyib.

Corner.az-ın məlumatına görə, bu barədə 34 yaşlı qolkiper ölkəsinin mətbuatına açıqlamasında deyib. Namaşko bu cür məsələlərə xüsusi yanaşmadığını bildirib.

Moldovalı qapıçının sözlərinə görə, matçdan sərhal sonra Moldovaya yola düşüb: "Ziyafət, əl yükü, aeroport... Kubokdakı qələbəni belə qeyd etdim. Çempionatdakı uğursuzluqdan sonra hədəf avrokuboklar və sonuncu olmamaq idi. Sonda istəyimizə çatdıq".

Təcrübəli qapıçı rəhbərliyin komandanın qarşısına qoyduğu məqsədə nail olduqlarını vurğulayıb: "Futbol ili çox qeyri-sabit keçdi, yaxşı və uğursuz oyunlar oldu, uğursuzluqlar da oldu. Amma yekunda ölkə kubokunu qazana bildik".

"Keşlə" ilə müqaviləsi başa çatan Namaşko gələcəyi barədə danışmaq istəməyib: "Komandada kimin qalacağını yalnız baş məşqçi bilir. Nəyisə təxmin etməyi sevmirəm. Yaxın günlərdə yığmaya qoşulacağam. Hazırda əsas fikrim millinin oyunlarındadır".

O, Azərbaycan millisi ilə iyunun 6-da Kişineuda keçirəcəkləri yoldaşlıq oyununa da toxunub: "Azərbaycanda 4 il birlikdə oynadığım uşaqları görmək xoş olacaq. Bəziləri ilə komanda yoldaşı, bəziləri ilə rəqib olmuşam. "Keşlə"dən milliyə dəvət alan Şəhriyar Əliyev və Azər Salahlı ilə danışmışam. Onlarla Kişineuda görüşəcəyik".