Neftçi'də özümü çox rahat hiss edirəm - Maçado

"Buradakı şəraitdən çox razıyam. Hətta başqa ölkəyə bu qədər tez uyğunlaşdığım üçün bir az təəccübləndim. Bunun çətin olacağını düşünürdüm".

Corner.az-ın məlumatına görə, bunu "Neftçi"nin futbolçusu Ramon Maçado paytaxt klubuna adaptasiyası barədə "terra.com.br" saytına açıqlamasında deyib.

30 yaşlı hücumçu əvvəlcə uyğunlaşma prosesinin çətin olacağını ehtimal etdiyini söyləyib: "Amma burada tərcüməçi, Cənubi Amerikadan və Portuqaliyadan futbolçular var. Həmçinin fiziki hazırlıq üzrə məşqçimiz ispandır. Bütün bunlar mənə çox kömək edir. "Neftçi"də özümü çox rahat hiss edirəm".

Braziliyalı futbolçu "Neftçi"dəki startından da razılığını vurğulayıb: "Vurduğum qollarla komandaya kömək edirəm. Ümid edirəm ki, Premyer Liqada çempionluq titulunu qoruyacağıq".

Qeyd edək ki, Ramon Maçado "Neftçi"nin heyətində 2 qol vurub.