Futbol üzrə Azərbaycan Kubokunun 1/4 final mərhələsi çərçivəsində “Sabah” və “Neftçi” arasında keçirilən cavab matçında qalmaqal yaşanıb. Corner.az xəbər verir ki, 74-cü dəqiqədə "Sabah"ın futbolçusu Aleksey İsayev ona qarşı kobud oynayan Eddi İsrafilovu vurub.
Nəticədə hər iki komandanın futbolçuları arasında gərginlik yaşanıb. “Sabah”da çıxış edən "Neftçi"nin sabiq qapıçısı Səlahət Ağayev də onların arasına qatılıb. Ağayev qonaq komandanın müdafiəçisi Voyislav Stankoviçi itələyib.
Baş hakim Rəvan Həmzəzadə İsayevə və Ağayevə birbaşa qırmızı vərəqə göstərib. Referi baş verənlərə sərt etiraz edərək meydana daxil olan “Sabah”ın baş məşqçisi Murad Musayevi də texniki zonadan qovub.
“Neftçi”dən isə İsrafilov və baş məşqçi Samir Abasov sarı vərəqə alıblar.
Qeyd edək ki, hazırda "Neftçi" 3:1 hesabı ilə öndədir. Komandalar arasındakı ilk görüş 1:1 hesabı ilə bitib.
