Azərbaycan Premyer Liqasında 17-ci turun oyunları çərçivəsində "Sabah" evdə "Neftçi"yə məğlub olub. Corner.az xəbər verir ki, “Bank Respublika Arena”da baş tutan matçda meydan sahiblərinin yeni transferi Boyan Letiç Premyer Liqada debüt edib. Qarşılaşmaya start heyətində başlayan 29 yaşlı müdafiəçi sona kimi meydanda olub.
Bosniya və Herseqovinalı futbolçu həmyerlisi Mario Marinadan sonra “Sabah”da şans qazanan ikinci bosniyalı futbolçu kimi klubun tarixinə düşüb. Mario 2019/20 və 2020/21-ci illər mövsümlərində bu komandanın uğurları üçün çalışmışdı.
