Futbol üzrə Azərbaycan Premyer Liqasında 2021/22 mövsümünun medalçılarının mükafatlandırma mərasimi keçirilib. Corner.az xəbər verir ki, 28-ci turun "Qarabağ" - "Neftçi" görüşündən sonra "Azersun Arena"da baş tutan tədbirdə “Qarabağ”a çempionluq kuboku və qızıl medallar, “Neftçi”yə gümüş, “Zirə”yə isə bürünc medallar təqdim edilib.
AFFA prezidenti Rövnəq Abdullayev, Peşəkar Futbol Liqasının prezidenti Ramin Musayev və AFFA-nın baş katibi Sərxan Hacıyevin iştirak etdiyi mərasimdə əvvəlcə “Zirə” bürünc medallarla təltif olunub. Bu, “qartallar”ın tarixində ikinci medalıdır. Qəsəbə təmsilçisi 2015/16 mövsümündə gümüş medalları qazanmışdı.
Daha sonra gümüş mükafatçı “Neftçi”nin futbolçuları, texniki heyət və rəhbərliyi gümüş medallarına qovuşub.
Sonda isə qızıl medalların sahibi “Qarabağ” mükafatlandırılıb. Hələ 25-ci turda çempionluğu rəsmiləşdirən Ağdam klubu 9-cu dəfə titulun sahibi olub. Tədbirin sonunda “Qarabağ” futbolçuları çempionluq kubokunu başları üzərinə qaldırıblar.
12 qolla çempionatın ən sərrast futbolçusu olan "Qarabağ"ın yarımmüdafiəçisi Kadi Borgesə də xüsusi mükafat verilib. O, Azərbaycan çempionatları tarixində Reynaldo Silvadan sonra 2-ci braziliyalı bombardirdir.
