“Neftçi”nin zədəli futbolçularının durumuna aydınlıq gəlib. Corner.az xəbər verir ki, klubun baş həkimi Şaiq Zöhrablı yarımmüdafiəçi Rəhman Hacıyevin yenidən sıradan çıxdığını bildirib.
Onun sözlərinə görə, zədəsini yenicə sağaldan 30 yaşlı hücumameyilli oyunçunun dönüşü yubanacaq: “Rəhmanın sol baldır əzələsində dartılma var idi. Zədəsini sağaltmışdı, son zamanlar individual hərəkətlərə başlamışdı. Lakin iki gün əvvəl sağ baldır əzələsində ağrı hiss elədi. MRT müayinəsindən sonra sağ baldır əzələsində də dartılma aşkarlanıb. Bu üzdən yenidən müalicəyə başlanılıb. Hazırda vəziyyəti stabildir. 2-3 gündən sonra individual hərəkətlərə başlamasını planlaşdırırıq”.
Baş həkim əlavə edib ki, digər zədəli yarımmüdafiəçilər Eddi İsrafilov və Fərid Yusifli hazırda fiziki məşqçinin başçılığı altında kollektivdən ayrı hazırlaşırlar.
