Misli Premyer Liqasının 22-ci turunda “Şamaxı” ilə oyun “Sumqayıt”ın baş məşqçisi Samir Abasov üçün əlamətdar olub. Corner.az saytı xəbər verir ki, 45 yaşlı çalışdırıcı bu qarşılaşmada yubiley matçına çıxıb.
Belə ki, Abasov “gənclik şəhəri” təmsilçisinin sükanı arxasında 100-ü çempionat görüşünü keçirib. O, 2015-2018-ci illər aralığındakı üç mövsümdə “Sumqayıt”ı 85 matça çıxarıb. Ötən ilin sentyabrında yenidən “kimyaçılar”a təyin olunan çalışdırıcı bu dəfə daha 15 Premyer Liqa oyununun iştirakçısı olub.
Samir Abasovun rəhbərliyi altında “Sumqayıt” 100 qarşılaşmadan 33-də qələbə qazanıb, 26-da heç-heçə edib, 41-də isə məğlub olub. Bu matçlardakı ümumi top fərqi də mənfidir – 113:135. “Sumqayıt” bu görüşlərdə 125 xal toplayıb.
Qeyd edək ki, “Sumqayıt” – “Şamaxı” oyunu birincilərin 1:0 hesablı qələbəsi ilə yekunlaşıb.
