Misli Premyer Liqasının 24-cü turunda “Sumqayıt”la keçirilən oyun “Kəpəz” üçün əlamətdar olub. Corner.az xəbər verir ki, komanda çempionatda ardıcıl ikinci qələbəsini qazanaraq, 6 illik seriyanı qırıb.
Tərlan Əhmədovun rəhbərlik etdiyi Gəncə təmsilçisi 23-cü turda “Şamaxı”nı 3:2, bu turda isə “Sumqayıt”ı 2:1 hesabı ilə məğlub edib.
Maraqlıdı ki, gəncəlilər Premyer Liqada 6 ildən sonra ardıcıl iki qələbə sevinci yaşayıb. Komanda sonuncu belə uğura 2016-17 mövsümünə nail olub. Qərb klubu 2017-ci aprelində ardıcıl 4 görüşdə qalib gəlib. Həmin vaxtdan bəri gəncəlilər çempionatda ardıcıl iki qələbə görməyiblər.
“Kəpəz” eyni zamanda “Sumqayıt”la matçda rəqibi iki dəfə mərkəzə dəvət etməklə, qol vurduğu oyun sayını 400-ə çatdırıb. Yalnız üç komanda - “Qarabağ”, “Neftçi” və “Şamaxı” daha çox matçda fərqlənib.