Misli Premyer Liqasının 26-cı turunda “Səbail”ə 3:0 hesabı ilə qalib gələn “Qarabağ” 2022-23 mövsümünün medallarını təmin edib. Corner.az xəbər verir ki, Ağdam təmsilçisinin mövsümü ən azı bürünc medalla başa vuracağı rəsmiləşib.
Hazırda aktivində 68 xal olan Qurban Qurbanovun kollektivi 4-cü pillədəki “Zirə”ni 31 xal qabaqlayır. Çempionatda sona 10 tur qaldığından, qəsəbə təmsilçisinin liderə çatmaq şansı qalmayıb.
Bununla, “Qarabağ” 17-ci dəfə Azərbaycan çempionatını medalla başa vuracaq. Komanda indiyə qədər 9 qızıl, 4 gümüş, 3 bürünc mükafat əldə edib.
Ağdamlılar medal sayında yalnız “Neftçi”dən geri qalır. Bakılıların aktivində 20 mükafat olub.
Qeyd edək ki, “Qarabağ” 1993, 2013-14, 2014-15, 2015-16, 2016-17, 2017-18, 2018-19, 2019-20, 2021-22 mövsümlərində çempion olub. Komanda 1993-94, 1996-97, 2012-13, 2020-21 mövsümlərində gümüş, 2003-04, 2009-10, 2010-11 mövsümlərində isə bürünc qazanıb.
