Misli Premyer Liqasının XXXI turunda 3 heç-heçə qeydə alınıb. Corner.az saytı xəbər verir ki, bununla 2022-23 mövsümünün rekordu təkrarlanıb. Turun “Şamaxı” – “Kəpəz”, “Səbail” – “Neftçi” görüşlərində 1:1, “Qarabağ” – “Zirə” qarşılaşması isə 2:2 hesabı ilə başa çatıb.
Cari mövsüm ilk dəfə belə göstərici XV turda yaşanıb. Maraqlıdı ki, həmin vaxt da məhz eyni cütlər üz-üzə gəliblər. Ötən ilin noyabrına təsadüf edən turda “Qarabağ”la “Zirə”nin duelində qol səsi çıxmayıbsa, Şamaxı və Sumqayıtdakı qarşılaşmalarda 1:1 hesabı olub.
Bu heç-heçələrdən ikisi yubileylə əlamətdar olub. “Şamaxı” – “Kəpəz” matçı 1:1 hesabı ilə yekunlaşan 500-cü oyun kimi tarixə düşüb.
Çempionatımızda 150-ci dəfə 2:2 hesabı isə “Qarabağ” – “Zirə” görüşündə yaşanıb.
Qeyd edək ki XXXI turun digər oyunlarında “Sabah” “Turan Tovuz”a 2:0, “Qəbələ” “Sumqayıt”a 3:2 hesabı ilə qalib gəlib.