Azərbaycan Kubokunun finalına vəsiqə “Neftçi” və “Qəbələ”nin tarixə düşməsinə səbəb olub. Corner.az xəbər verir ki, adıçəkilən komandalar ikinci dəfə həlledici görüşdə rəqib olmaqla əlamətdar statistik göstərici ortaya qoyublar.
Belə ki, onlar ölkə kubokunun 31 illik tarixində finalda iki və daha çox qarşılaşan 5-ci cüt olacaq. “Neftçi” ilə “Qəbələ” buna qədər ilk dəfə 2013-14 mövsümündə finalda qarşılaşıb. 9 il əvvəlki matç 1:1 hesabı ilə yekunlaşıb və penaltilər seriyası ilə paytaxt təmsilçisi 3:2 hesablı qələbəyə sevinib.
Finalda ən çox görüşmə rekordu “Neftçi” ilə “Qarabağ”a məxsusdu. Onlar 3 dəfə həlledici görüşdə qarşılaşıblar. “Neftçi” 1995-96 mövsümündə 3:0, “Qarabağ” 2014-15-də 3:1, 2015-16-da isə 1:0 hesablı qələbə qazanıb.
Digər üç cütdə eyni komandaların final duelindən eyni klub qalib ayrılıb. “Neftçi” “Şəmkir”i 1998-99 (0:0, pen.5:3) və 2003-04 (1:0, əlavə vaxtda) mövsümündə, “Kəpəz” “Qarabağ”ı 1997-98 (2:0) və 1999-2000 (2:1) mövsümündə, “Xəzər Lənkəran” isə “İnter”i 2007-08 (2:0, əlavə, vaxtda) və 2010-11 (1:1, pen.4:2) mövsümündə məğlub edib.
Qeyd edək ki, final görüşü iyunun 3-də “Bakcell Arena”da olacaq.
