Misli Premyer Liqasının XXXII turunda “Kəpəz”lə oyun “Sumqayıt”ın baş məşqçisi Samir Abasov üçün əlamətdar olub. Corner.az saytı xəbər verir ki, qarşılaşma təcrübəli mütəxəssis üçün ikiqat uğurla yadda qalıb.
45 yaşlı çalışdırıcı komandasının səfərdə 1:0 hesabı ilə qalib gəldiyi qarşılaşmada Premyer Liqada 75-ci uğuruna imza atıb. Abasov 75 qələbə həddinə çatmaq üçün 190 görüş keçirməli olub.
Onun rəhbərliyi altında “Sumqayıt” 36, “Neftçi” 31, “Zirə” isə 8 dəfə meydanı 3 xalla tərk edib. Samir Abasov Azərbaycan çempionatları tarixində 75 qələbəyə çatan 14-cü mütəxəssisdi.
Bu, həm də “Sumqayıt”ın Samir Abasovla 122-ci görüşü olub. O, “gənclik şəhəri” təmsilçisinin sükanı arxasında 40-cı qalibiyyət sevinci yaşayıb. Həmin matçların 36-sı çempionatda, 4-ü kubokda olub.
