Misli Premyer Liqasının XXXIII turunda “Neftçi” ilə oyun “Turan Tovuz” üçün ilklərlə yadda qalıb. Corner.az saytı xəbər verir ki, Tovuz təmsilçisinin rəqibini 4:0 hesabı ilə məğlub etdiyi qarşılaşma yeni rekordlarla əlamədar olub.
Tovuzlular bununla ilk dəfə bir qarşılaşmada rəqib qapısından 4 top keçiriblər. “Ağ-qaralar”ı üç dəfə mərkəzə dəvət edən hücumçu Runi Eva isə çempionatda ilk het-trikin müəllifi kimi “Turan Tovuz”un tarixinə düşüb.
O, eyni zamanda çempionatımızda het-trikə imza atan ilk kamerunlu olub. Runiyə qədər Afrika qitəsindən olan oyunçular bunu 7 dəfə bacarmışdılar. Əhməd Ticani 2, digərləri isə 1 dəfə het-trik müəllifi olub.
Runi Eva həm də cari mövsüm Premyer Liqada het-trik edən ikinci oyunçudu. Ona qədər yalnız “Neftçi”nin kapitanı Emin Mahmudov bunu bacarıb. Yarımmüdafiəçi XV turda “Səbail”lə görüşdə rəqibi 3 dəfə məyus edib.
