Misli Premyer Liqasının XXXIV turunda “Kəpəz”lə oyun “Zirə”nin qapıçısı Anar Nəzirov üçün əlamətdar olub.
Corner.az xəbər verir ki, veteran qolkiper paytaxt klubunun heyətində 100-cü görüşünə çıxıb.
1:1 hesabı ilə yekunlaşan qarşılaşmada 38 yaşlı qolkiper 90 dəqiqə çərçivəni qoruyub. O, “Zirə”nin Azərbaycan çempionatları tarixində 100 oyun həddinə çatan üçüncü futbolçudu. Nəzirova qədər İlkin Muradov və Təmkin Xəlilzadə bunu bacarıb. Xəlilzadənin göstəricisinə çatmaq üçün Anara cəmi 2 matç qalıb. Rekordçu Muradovun aktivində isə 114 görüş var.
Anar Nəzirov ilk olaraq 2015-2019-cu illərdə “Zirə”nin şərəfini qoruyub və 2021-ci ildə yenidən qayıdıb. O, bu oyunlarda qapısında 111 top görüb.
Qeyd edək ki, Anar Nəzirov “Zirə”nin heyətində 2015-ci ildə debüt edib. Həmin il avqustun 9-da AZAL-la (1:0) çempionat qarşılaşmasında o, qapıda dayanıb.
