“Qəbələ”nin braziliyalısı “Səbail”ə can atır

“Qəbələ” mövsümün sonunda daha bir əcnəbi futbolçusunu itirə bilər.

Corner.az saytının əldə etdiyi məlumata görə, yarımmüdafiəçi Felipe Santos Premyer Liqanın digər komandasının diqqət mərkəzinə düşüb.

Rafael Utziq “Neftçi”nin transfer gündəmindədisə, Santosla “Səbail” yaxından maraqlanır. Qəsəbə təmsilçisi Premyer Liqada qalacağı təqdirdə, rəhbərlik yayda ciddi maliyyə yatırımı edəcək və avrokuboklara iddia edəcək heyət formalaşdırmağa çalışacaq.

Bakılıların heyətə cəlb etməyi planlaşdırdığı oyunçulardan biri də Santosdu. Braziliyalı hücumameyilli oyunçu ilə hətta ilkin danışıq da olub. Santosa elə məvacib təklif olunub ki, 26 yaşlı futbolçu özü “Səbail”ə keçməyə can atır. Onun maliyyə durumu ilə əlaqədar “Qəbələ”də qalmaq fikri yoxdu.

Qeyd edək ki, Felipe Santos “Qəbələ”yə mövsümün əvvəlində “Şamaxı”dan keçib.