Azərbaycan Kubokunda 11 mövsümün rekordu

Azərbaycan Kubokunda son 11 mövsümün rekordu qırılıb. 90deqiqe.az xəbər verir ki, bu, I təsnifat mərhələsinin “Baku Sportinq” – “Kürmük Qax” oyununda baş verib.

Rəqibini 6:0 hesabı ilə məğlub edən birincilər II raunda yüksəliblər. Elman Sultanovun yetirmələri kubokda ən böyükhesablı qələbə qazanan aşağı liqa təmsilçisidi.

Buna qədər Premyer Liqada iştirak etməyən komandaların kubok matçlarında 6 və ya daha çox top fərqi 2012-13 mövsümünün 1/16 final mərhələsində olub. 2012-ci il oktyabrın 24-də “Qaradağ Lökbatan” “Lokomotiv”in (Biləcəri) qapısından 7 cavabsız top keçirmişdi. “Baku Sportinq” isə 4042 gün sonra bu uğura imza atıb.

Ümumiyyətlə, Azərbaycan Kubokunda 6 top fərqi 58-ci dəfə qeydə alınıb. Bunun 10-u aşağı liqa komandalarının payına düşür.