Qurban Qurbanov üçün tarixi oyun

Premyer Liqanın XVIII turunda “Zirə” ilə oyun “Qarabağ”ın baş məşqçisi Qurban Qurbanov üçün tarixi hadisə ilə əlamətdar olub. 90deqiqe.az xəbər verir ki, təcrübəli mütəxəssis baş məşqçi kimi Azərbaycan çempionatlarında 500-cü oyununu keçirib.

Onun yubiley qarşılaşmasında komandası “Zirə”ni 1:0 hesabı ilə məğlub edib. 51 yaşlı çalışdırıcı karyerası ərzində yalnız “Neftçi” və “Qarabağ”da işləyir. Bu müddətdə Qurbanovun komandaları 312 qələbə qazanıb, 117 heç-heçə edib, 71 dəfə isə uduzub.

Qurbanov Premyer Liqadakı oyun sayında mütləq rekordçudu. Onun ən yaxın izləyicisi olan Qəhrəman Əliyevin aktivində 381 görüş var.

Qeyd edək ki, Qurban Qurbanovun debütü 2006-cı ilin avqustuna təsadüf edib. 2006-07 mövsümündə onun rəhbərlik etdiyi “Neftçi” “Gənclərbirliyi”nə 6:1 hesabı ilə qalib gəlib.