Azərbaycan Premyer Liqası: 180 oyunda 469 qol

Azərbaycan Premyer Liqasında 2023-cü ilə yekun vurulub. 90deqiqe.az xəbər verir ki, 2022-23 mövsümünün ikinci, 2023-24 mövsümünün ilk yarısında ümumilikdə 180 oyun keçirilib.

Bu müddətdə 11 komanda Premyer Liqada mübarizə aparıb. “Şamaxı” ötən, “Araz-Naxçıvan” cari çempionatda 18 görüşə çıxıb. Digər komandalar 36 qarşılaşmada iştirak edib.

İlin ən yaxşı komandası “Qarabağ”dı. Ötən mövsümün çempionu və cari çempionatın lideri il ərzində hamıdan çox – 25 qələbə qazanıb, hamıdan çox – 88 qol vurub və 81 xalla ən yaxın izləyicilərini 21 xal qabaqlayır.

“Sabah” il ərzində topladığı 60 xalla ikincidi. “Neftçi” isə üçüncü sırada qərarlaşıb.

Qeyd edək ki, 180 görüşdə 469 qol vurulub.