"Sabah" "Kəpəz"i məğlub etdi

Bu gün Azərbaycan Premyer Liqasında XXIII tura start verilib.

90deqiqe.az xəbər verir ki, ilk oyun günündə iki matç keçiriləcək.

“Bank Respublika Arena”da təşkil olunan görüşə qonaqlar erkən qolla başlayıblar. Martins Junior 6-cı dəqiqədə hesabı açıb. Buna baxmayaraq, meydan sahibləri 38-ci dəqiqədə Kahim Parrisin gözəl qolu ilə “status-kvo”nu bərpa ediblər. 55-ci dəqiqədə Cesse Sekidika “Sabah”ı hesabda önə keçirib. 79-cu dəqiqədə gəncəlilər üçüncü dəfə mərkəzə dəvət olunublar. Bu dəfə Kristian Da Silva adını tabloya yazdırıb.

Qarşılaşmada son nöqtəni isə qonaq komanda qoyub. 84-cü dəqiqədə Amil Yunanovun başla zərbəsi qarşısıalınmaz olub. Lakin “Kəpəz”in bundan artığına gücü çatmayıb.

Nəticədə 3:2 hesablı əzmkar qələbə qazanan “Sabah” xallarının sayını 31-ə çatdıraraq, turnir cədvəlində beşinci pilləyə yüksəlib. Doqquzuncu sırada qərarlaşan “Kəpəz” isə 20 xalda qalıb.

Günün ikinci görüşündə “Səbail”lə “Araz-Naxçıvan” qarşılaşacaqlar.

Qeyd edək ki, bir matçı təxirə salınan turun iki görüşü sabah keçiriləcək.