“Sabah” “Zirə”ni məğlub etdi, “Şamaxı” Yevlaxdan qələbə ilə döndü

Misli Premyer Liqasının XVIII turunda növbəti qarşılaşmalar baş tutub.

90deqiqe.Az-ın məlumatına görə, Yevlax şəhər stadionunda keçirilən oyunda “Kəpəz” doğma meydanda “Şamaxı”nı qəbul edib. Görüş qonaqların 2:0 hesablı qələbəsi ilə yekunlaşıb. “Şamaxı”nın heyətində Arsen Ağcabəyov 12-ci dəqiqədə, Karim Rossi isə ilk hissəyə əlavə olunmuş vaxtda (45+1) fərqlənib. Ayxan Abbasovun rəhbərlik etdiyi kollektiv bu qələbə sayəsində xallarının sayını 24-ə çatdıraraq turnir cədvəlində 7-ci pilləyə yüksəlib. “Kəpəz” isə 12 xalla 11-ci sırada qalıb.

Tur çərçivəsində lider “Sabah” da növbəti qələbəsini qazanıb. Zirə İdman Kompleksinin stadionunda keçirilən matçda “bayquşlar” “Zirə”ni 3:1 hesabı ilə məğlub ediblər. Qonaqların heyətində Velko Simiç (10), İvan Lepiniça (22) və Xəyal Əliyev (27) qolların müəllifi olublar. “Zirə”nin yeganə qolunu isə 83-cü dəqiqədə David Volkov vurub. Bu nəticədən sonra “Sabah” 43 xalla turnir cədvəlinə liderlik edir. 29 xalı olan “Zirə” isə 5-ci pillədə qərarlaşıb.

Qeyd edək ki, turun əvvəlki görüşlərində “Sumqayıt” “Karvan-Yevlax”a 2:0 hesabı ilə qalib gəlib. Misli Premyer Liqasının XVIII turuna fevralın 1-də yekun vurulacaq.