“Qarabağ” son dəqiqə qolu ilə “Şamaxı”nı məğlub etdi

Misli Premyer Liqasının XIX turunda “Qarabağ” səfərdə “Şamaxı”nı məğlub edib.

90deqiqe.Az xəbər verir ki, Şamaxı şəhər stadionunda keçirilən qarşılaşma Ağdam təmsilçisinin 2:1 hesablı qələbəsi ilə başa çatıb. Oyunda hesab 14-cü dəqiqədə meydan sahiblərinin heyətində Oruc Məmmədov tərəfindən açılıb. Cəmi 4 dəqiqə sonra “Qarabağ”ın yarımmüdafiəçisi Joni Montiel cərimə zərbəsindən baxımlı qola imza ataraq tarazlığı bərpa edib.

Gərgin keçən matçın taleyi son dəqiqələrdə həll olunub. 90+4-cü dəqiqədə Kamilo Duran qonaqlara qələbə qazandıran qolu vurub.

Bu nəticədən sonra xallarının sayını 42-yə çatdıran “Qarabağ” turnir cədvəlinin 2-ci pilləsində qərarlaşıb. 23 xalı olan “Şamaxı” isə 8-ci sırada yer alır.

Günün ikinci oyununda “Neftçi” “Qəbələ”ni qəbul edəcək.

Qeyd edək ki, turun əvvəl keçirilən görüşlərində “Sabah” “Araz-Naxçıvan”ı (4:1), “Zirə” “Sumqayıt”ı (3:2), “Turan Tovuz” “Karvan-Yevlax”ı (1:0) hesabı ilə məğlub edib. “İmişli” – “Kəpəz” oyununda isə qalib müəyyənləşməyib.