"Zirə" heç-heçə etdi, "Neftçi" uduzdu

Misli Premyer Liqasında XXIII turun oyunları keçirilib.

90deqiqe.Az-ın məlumatına görə, tur çərçivəsində baş tutan görüşlərdən birində "Zirə" doğma meydanda "Kəpəz" ilə üz-üzə gəlib.

Zirə İdman Kompleksinin stadionunda keçirilən qarşılaşma gərgin mübarizə şəraitində keçib və 2:2 hesablı heç-heçə ilə başa çatıb.

Meydan sahiblərinin qollarını 5-ci dəqiqədə Eren Aydın, oyuna əlavə olunmuş dəqiqələrdə isə Ruan Renato vurub. Qonaqların heyətində isə 32-ci dəqiqədə Rauf Hüseynli, 51-ci dəqiqədə isə Diogo Verdasca fərqləniblər.

Bu nəticədən sonra “Zirə” xallarının sayını 39-a çatdıraraq turnir cədvəlində dördüncü pillədə qərarlaşıb. 17 xalı olan “Kəpəz” isə onuncu sırada yer alır.

Turun digər oyununda "Neftçi" doğma meydanda "Turan Tovuz" ilə qarşılaşıb.

“Palms Sports Arena”da keçirilən görüş qonaqların minimal hesablı qələbəsi ilə yekunlaşıb – 0:1. Oyunda yeganə qolu 56-cı dəqiqədə Joarlem Santos vurub.

Bu qələbədən sonra xallarının sayını 44-ə çatdıran Turan Tovuz turnir cədvəlində üçüncü pillədə qərarlaşıb. “Neftçi” isə 31 xalla yeddinci yerdədir.

Qeyd edək ki, turun əvvəlki oyunlarında "Sumqayıt" – "Karvan Yevlax" (1:1), "Şamaxı" – "İmişli" (0:0) bərabərə qalıb. "Qarabağ" isə "Araz-Naxçıvan" üzərində 6:0 hesablı qələbə qazanıb.

XXIII tura martın 10-da yekun vurulacaq.