“Sabah” tarixində ilk dəfə Azərbaycan çempionu oldu

Misli Premyer Liqasında mövsümün qalibi müəyyənləşib.

90deqiqe.Az-ın məlumatına görə, XXI turdan təxirə salınmış oyunda “Neftçi” klubunun “Qarabağ” üzərində 2:1 hesablı qələbəsi nəticəsində “Sabah” komandasının çempionluğu rəsmiləşib.

“Palms Sports Arena”da keçirilən qarşılaşmada hesabı 55-ci dəqiqədə Emil Səfərov açıb. 85-ci dəqiqədə Elvin Bədəlov avtoqol müəllifi olub, 90+2-ci dəqiqədə isə Bassala Sambu “Neftçi”yə qələbə qazandıran qolu vurub.

Bu nəticədən sonra xallarının sayını 47-yə çatdıran “Neftçi” turnir cədvəlində 4-cü pilləyə yüksəlib. 29 oyundan sonra 59 xalla 2-ci sırada qərarlaşan “Qarabağ”ın isə 72 xalla lider olan “Sabah”ı keçməsi mümkün olmayıb.

Beləliklə, “Sabah” klubu tarixində ilk dəfə Azərbaycan çempionu adını qazanıb.

Qeyd edək ki, “Qarabağ”a qarşı 18 oyunluq qələbəsizlik seriyası yaşayan “Neftçi” son dəfə rəqibini 2021-ci ildə məğlub etmişdi.