"Qarabağ" Bədavi Hüseynovla yeni müqavilə imzaladı

"Qarabağ" futbolçusu Bədavi Hüseynovla bağlı qərarını rəsmən açıqlayıb.

90deqiqe.Az xəbər verir ki, Ağdam təmsilçisi Azərbaycan millisinin müdafiəçisi ilə müqavilənin müddətini uzadıb.

Tərəflər arasında imzalanan yeni anlaşmaya əsasən, 33 yaşlı futbolçu 2027-ci ilin yayına qədər "Qarabağ"ın uğurları üçün mübarizə aparacaq.

2012-ci ildən Ağdam klubunun şərəfini qoruyan Bədavi Hüseynov bu müddət ərzində komandanın əsas simalarından birinə çevrilib. Təcrübəli müdafiəçi Premyer Liqada "Qarabağ"ın heyətində keçirdiyi 267 oyunda 5 qol vurub.

Bədavi Hüseynov klub karyerasında "Qarabağ"la 11 dəfə Azərbaycan çempionluğu, 5 dəfə isə ölkə kubokunu qazanıb. Azərbaycan millisinin də üzvü olan müdafiəçi yığmanın heyətində keçirdiyi 82 görüşdə 1 qolla yadda qalıb.

Qeyd edək ki, Hüseynov hazırda "Qarabağ"ın ən təcrübəli və uzunmüddətli futbolçularından biri hesab olunur.