“Turan Tovuz”, “İmişli” və Rəşad Sadıqov üçün əlamətdar göstəricilər

Azərbaycan Premyer Liqasının IX turu “Turan Tovuz”, “İmişli” və “Zirə”nin baş məşqçisi Rəşad Sadıqov üçün əlamətdar olub.

Peşəkar Futbol Liqasından 90deqiqe.Az-a verilən məlumata görə, “Neftçi” ilə səfər matçı (1:1) “Turan Tovuz”un Premyer Liqada 150-ci oyunu olub. Bu qarşılaşmaların 74-ü evdə, 76-sı isə səfərdə keçirilib. Tovuz təmsilçisi indiyədək 58 qələbə qazanıb, 42 dəfə heç-heçə edib və 50 məğlubiyyət alıb. Komanda bu oyunlarda 186 qol vurub, qapısından 174 top buraxıb.

Beləliklə, “Turan Tovuz” Azərbaycan çempionatı tarixində 150 və daha çox oyun keçirən 26-cı komanda olub. Qərb təmsilçisi Premyer Liqada ilk matçını 2022-ci il avqustun 8-də doğma meydanda “Qəbələ”yə qarşı keçirib və 0:2 hesabı ilə məğlub olub.

“İmişli” isə “Şamaxı” üzərində 2:1 hesablı qələbə qazanaraq Premyer Liqada 10-cu uğuruna imza atıb. Çempionatda ikinci mövsümünü keçirən komanda 42-ci oyununda yubiley qələbəsini əldə edib. Bu qələbələrin ikisi evdə, səkkizi isə səfərdə qazanılıb. “İmişli” Azərbaycan çempionatı tarixində ən azı 10 qələbəsi olan 52-ci komanda kimi qeydə alınıb. Təmsilçinin ilk qələbəsi 2025-ci il avqustun 31-də “Sabah”la səfər matçında 1:0 hesabı ilə qeydə alınıb.

IX tur “Zirə”nin baş məşqçisi Rəşad Sadıqov üçün də əlamətdar olub. Onun rəhbərliyi altında komanda 250-ci oyununa çıxıb. “Qartallar” yubiley matçında “Sumqayıt”ı doğma meydanda 3:2 hesabı ilə məğlub edib.

2020-ci ilin iyulundan “Zirə”yə rəhbərlik edən Sadıqovun baş məşqçiliyi dövründə komanda 112 qələbə qazanıb, 76 heç-heçə edib və 62 dəfə məğlub olub. Bu müddətdə “Zirə” 316 qol vurub, qapısından isə 237 top buraxıb. Sadıqovun rəhbərliyi altında keçirilən 250 oyunun 206-sı Premyer Liqada, 28-i ölkə kubokunda, 16-sı isə avrokuboklarda baş tutub.

Qeyd edək ki, Rəşad Sadıqovun “Zirə”nin baş məşqçisi kimi debütü 2020-ci il avqustun 23-də Premyer Liqanın “Qəbələ” ilə səfər oyununda olub. Həmin qarşılaşma 1:1 hesabı ilə yekunlaşıb.