- Misli Premyer liqa
- 11:11 23.10.2024
"Səbail"in yarımmüdafiəçisi Yevgeni Koçuk Azərbaycan Premyer Liqasının 12-ci turunda "Sabah"a 1:3 hesabı ilə uduzduqları oyundan sonra brifinqdə jurnalistlərin suallarını cavablandırıb.
- Matçla bağlı fikirlərin necədir?
- Fasilədən sonra bütün komandalar üçün çətin olur. Fikrimcə, eyni səviyyəli oyun oynadıq. Oyunda ilk qolu vuran da biz idik. Hesabı qoruyub-saxlamalıydıq. Sadəcə meydanda azlıqda qaldıq. Hardasa diqqətsizlik oldu və birdən-birə üç qol buraxdıq. Oyunun əvvəlində təmiz penaltimiz verilmədi. "Keşlə” ilə oyunda da təmiz qolumuzu saymadılar, indi də penaltimizi vermirlər. Hakimlərin nəyə görə belə etdiyi mənim üçün də maraqlıdır.
- Qələbə qazanmağınıza nə mane oldu?
- Oyunun başa çatmasına 10 dəqiqə qalmışdı. Konsentrasiya çatmadı.
- Qırmızı vərəqə nəticəyə nə dərəcədə təsir etdi?
- Təsir etdi. Amma 10 nəfərlə də 5 dəqiqə hesabı qorumaq olardı.
- Qış fasiləsinə iki tur qalıb. Necə olacaq?
- Qələbəyə oynamaq istəyirik. Oyunlara hazırlaşacağıq. Pis nəticələr göstəririksə, çempionatda iştirak etməməliyik? Səhvlərimizi analiz edəcəyik, növbəti oyunlarda qələbə üçün oynayacağıq.
- Səncə, “qara zolaq”dan çıxa biləcəksiniz?
- Əlbəttə ki, çıxa bilərik. Niyə də çıxmayaq? Sadəcə bir qələbə qazanmalıyıq ki, hər şey yoluna düşsün.
- Səkkiz oyundur ki, komanda qalib gələ bilmir. Əsas problemi nədə görürsən?
- Pis oynamırıq, yaxşı oyun göstəririk. Sadəcə geridə qalan 8 oyunda düşən qol imkanlarından düzgün istifadə edə bilmirik. Hücumdakı epizodlardan dəqiq istifadə etməliyik.